Trano miisa 7 no indray novakian’ny jiolahy tany Ambatolaona Mantasoa. Nidina teny an-toerana avy hatrany ny lehiben’ny borigadin’ny zandarimaria raha vao nahare izany ka nahita ifotony fa tena voaroba tokoa ireo trano ireo. Nampandre ny mpitandro filaminana ao Ambatolaona izy mba hanao ny sakana rehetra ka tra-tehaka ny lehilahy miisa 4 nitondra fitaovana famakian-trano sy ireo entana very. Teo amin’ny 100 metatra tsy hiditra an’Ambatolaona no nahatratrarana ireo jiolahy raha tany amin’ny fokontany Andrefan’Ivorona kosa no nisian’ilay vakitrano. Hay tamin’ny loharanom-baovao ihany koa fa mpiambina iray no nodarohan’ireo jiolahy ka naratra mafy. Ny borigadin’i Mantasoa no manao ny fanadihadiana mahakasika ity raharaha ity. Raha ny tsikaritra dia mateti-pitranga ny fanafihana mitondra sabatra tato ho ato. Vao tsy ela ihany koa mantsy teny Ampatsy Soamanandrariny no nisy jiolahy miisa 6 niditra an-keriny tao an-tranon’olona. Lasan’izy ireo tamin’izany ny milina fanjairana sy ny kojakojan-dakozia samihafa. Ankoatra ny fanafihan-jiolahy mahery vaika mitam-basy izany dia efa miroso tsikelikely amin’ny fampiasana sabatra ihany koa ireo mpanao halabotry. Hatramin’ny fisoko avy no vakian’izy ireo ; toy ilay tranga nahaverezana akoho miisa 4 teny Tsarahonenana vao tsy ela akory izay.

Dom