Niafara tamin’ny faty olona ny baolim-pokontany tany Mahajanga. Nisy ny tsy nahataty vava sy tsy nahazaka resy ka tsy ny baolina boribory intsony no nifanenjehana nodakana fa ny mpilalao mihitsy no nifamono. Tsy vitan’izany fa mbola nisy nampiasa zava-maranitra ihany koa ka naratra mafy ny an-kilany. Tovolahy iray no voatsindron’antsy ka voatery nentina tany amin’ny hopitaly. Tsy tana anefa ny ainy ka niomana ny hamaly faty ireo mpiray tanàna aminy. Olona mipetraka ao Mahavoky ity maty ity ka nifampivory ny vatan-dehilahy rehetra fa hanao haza lambo sy fitsaram-bahoaka ilay nahavanon-doza. Nanoloana izany loza manambana izany dia efa nivonona ny hiaro tena ihany koa ny mponin’i Tsararano. Nahita izany rehetra izany ny sefom-pokontany ka nampandre haingana ny mpitandro filaminana mba hisorohana ny loza. Ny Emmoreg mihintsy no nandray an-tanana ny raharaha ka nidina teny an-toerana mba hitandro ny filaminana. Nisy ny vavolombelona nanatri-maso ny zava-nitranga ka nitantara tamin’ny mpitandro filaminana ny fandehan’ny ady.

Dom