Teo amin’ny varavarankely ireo jiolahy no niditra ary nanaram-po nibata izay zakany tao an-trano. Ireo entana tsaratsara sy lafo vidy toy ny solosaina, fahitalavitra fisaka, telefaonina, lektera no lasan-dry zalahy tamin’izany. Nisy ihany koa lelavola 4 hetsy ariary nobedain’ireo mpamaky trano. Tany Ankatafahely no nisehoan’io hala-botry io ary ny mpiambina tanàna efa noroahina ihany no ahiahian’ny tompon-trano ho nahavanon-doza. Izy io mantsy no mahafantatra tsara ny fandaharam-potoanan’ny tompon-trano sy ny entana ary ny hidin-trano. Matetim-pitranga ny toy izao ary matetika dia ireo nokaramaina hiambina sy hiaro indray no mahavanon-doza mivadika ho lasa jiolahy mpanafika. Hita ihany koa tato ho ato fa mirongatra be ny halabotry, indrindra amin’izao fotoanan’ny fampidirana mpianatra izao. Ireo entana mora amidy ka havadika vola haingana toy ny ordinatera sy fahitalavitra ary telefaonina sy lektera no tena batain’ireo jiolahy. Ankoatra ny fahasimban’ny toe-tsaina dia taratry ny fahantrana ny fisian’ny halatra toy izao. Tsy mahatanty ny fahoriana ireo marivo salosana ka mitetika ny hahazo vola amin’ny fomba tsotra ary lasa mangalatra.

Dom