Ataon’ny fokonolona mahita faisana mihitsy ny dahalo avy manao fanafihana any amin’ny faritra maro manerana ny Nosy. Miafara amin’ny fifandonana hatrany mantsy ny fanarahan-dia ka tsy maintsy misy dahalo maty na maratra mafy. Amin’ny ankapobeny ihany koa dia tafaverina avokoa ireo omby nangalarina. Tany Tsitampiky Ambato Boeny izao dia dahalo 3 no lavon’ny fokonolona rehefa raikitra ny fifandonana. Tafaverina avokoa ny omby nalain’izy ireo. Tany Ampahibe Tsiroanomandidy kosa indray dia malaso 1 no matin’ny mpanara-dia. Miisa 20 ireo jiolahy no nanafika tao an-tanàna tamin’io ka omby miisa 140 no lasan’izy ireo. Tsy nanaiky nolemebenana ny vahoaka sy ny mpitandro filaminana fa nanao ny fanenjehana ka raikitra ny fifandonana ny harivan’ny nisehoan’ilay fanafihana. Lavo ny dahalo iray ary nisy namany vitsivitsy hafa naratra mafy saingy nentin’ny namany nandositra.

Mbola mitohy ny fanenjehana fa ny zavatra tsikaritra dia tsy mahaleo ny tamba-ben’ny vahoaka ampian’ny zandary tosika mihitsy ny dahalo. Efa maro ny faritra tsara rafitra amin’ny fitandroana filaminana sy fiarovan-tena, izay sady manana paikady matotra entina hiatrehana ny asan-dahalo ihany koa ireo mponina sy ny mpitandro filamanina.

Dom