Vola mitentina 14 tapitrisa ariary no very ka ny 4 tapitrisa an’ny vazaha mpanera ary ny 10 tapitrisa kosa an’ilay mpamily. Tany Andalatanosy Ambovombe Androy no nitrangan’ny fanafihana ka fiara taksiborosy no lasibatra tamin’izany. Dahalo miisa 4 nirongo famaky no nanao ny fanafihana ka nosakanan’izy ireo tamin’ny vato be ny lalana. Rehefa tsy afa-nandeha intsony ilay fiara fitaterana dia raikitra ny tora-bato ka vaky ny fitaratra eo anoloana. Olona 3 no naratra vokatry ny vakim-pitaratra ary ilay vazaha kosa dia voa teo amin’ny tongony. Nanoloana izany herisetra izany dia tsy nisy sahy nihetsika ny rehetra fa nanatontosa ny baikon’ireo mpanafika fotsiny. Toa efa fantatr’izy ireo mialoha rahateo fa nitondra vola be ilay mpamily sy ilay vazaha. Ity farany moa dia amerikanina miasa amin’ny Ong Pact any Taolagnaro. Rehefa nahazo izay nilainy ireo mpanafika dia rifatra nandositra ary efa nanao ny fanarahan-dia ny zandary sy ny fokonolona rehefa naheno ny fanafihana. Tsy tratra teo noho eo anefa ireo dahalo. Lasa mihamatetika indray tato ho ato ny fanafihana fiara any atsimon’ny Nosy. tsy misy azo atao mihitsy  rehefa mitranga izany satria sady any ankebakeban-tany tsy misy mpahita no mbola ratsy tsy azo handosirana ihany koa ny lalana.

Dom