Ny namany ihany no namadika azy ary naniraka jiolahy hanafika. Tany Bemarivo Mampikony no nitrangan’io raharaha io ka very vola 30 tapitrisa Ariary ilay lehilahy. Olon-dratsy miisa 5 no nanafika azy ary tsy vitan’ny nandroba fa mbola nidaroka ihany koa. Naaratra mafy ary tapa-tanana sy tongotra ilay lasibatra ka voatery naiditra hopitaly mihitsy. Taorian’ny fanadihadian’ny zandary dia fantatra fa ny sakaizan’ilay mpandraharaha ihany no atidoha nikotrika ity fandrobana ity. Efa voasambotra io mpitsikombakomba io ary notanan’ny mpitandro filaminana mba hatao famotorana. Tsy afa-niala izy satria nisy ny porofo maro nahafahana nitazona azy. Mety ny fahitana ilay volabe no nahatonga ilay sakaizany nanana izany teti-dratsy izany ka nifampiraharaha tamin’ny jiolahy mpanafika. Tena naleony mihitsy very tsikalakalam-pihavanana toy izay hampangina ny fitsiriritana sy fialonana tao aminy.  Araka ny hita kosa dia mirongatra be ny fanafihana hakana vola na volamena any amin’iny faritanin’i Mahajanga iny. Ny fisian’ny bizina any ambadika any no tena mampirongatra izany hoy ny tompon’andraikitra. Ireo mpivarotra sy mpividy ary ny mpiray ombonantoka amin’ izy ireo ihany mantsy matetika no mifanafika.

Dom