Hanao savahao sy hazalambo ireo olon-dratsy no antom-pisian’ny zandary marobe any Mampikony fa tsy misy tany miady akory hoy ny loharanom-baovao ary any an-toerana. Fantatra fa nandany fepetra goavana ny mpitandro filaminana any Mampikony mba hanatsaharana ny tsy fandriam-pahalemana izay niha nahazo laka tato ho ato. Tamin’iny volana aogositra iny mantsy dia nahatratra 5 ny isan’ny olona maty novonoin’ny jiolahy tany an-toerana ka nahatonga ny zandary handray izao fepetra izao. Mitovitovy amin’izany ihany koa ny zava-mitranga any Ikongo satria nandefa zandary marobe any an-toerana ny kaompanian’i Manakara. Hanao asa fampandrian-tany mandritra ny 20 andro no tena anton’izao hetsika izao. Fepetra noraisina taorian’ny vaky fasana niteraka savorovoro sy fitsaram-bahoaka ity fandefasana zandary marobe ity. Andrasan’ny olona kosa mba hifantoka amin’ny ady amin’ny halatra taolam-paty izao hetsika izao fa tsy sanatria ho fanaovana antsojay amin’ireo mponina.