Tratran’ny akanga maro tsy vakin’amboa ny andian-dahalo iray tany Ivohibe ka niala maina ary nisy iray aza namoy ny ainy mihitsy. Miisa 12 ireo malaso no nanafika tamin’ny tanàna iray ny alin’ny sabotsy lasa teo ka omby miisa 26 no lasan’izy ireo. Efa matipaika anefa ny lamina napetraky ny fokonolona sy ny mpitandro filaminana ka vao raikitra ny antso vonjy fa nisy dahalo nanafika dia efa samy nandray ny andraikitra nankinina taminy ny tsirairay. Samy nihetsika avokoa ireo andrimasom-pokonolona, miampy ny dinabe sy ny kalaony nanao ny fanarahan-dia sy ny sakana rehetra. Efa nahare ny zava-nitranga rahateo ny tanàna manodidina ka nifanehitra tamin’ny Jama tany amin’ny 22 kilaometatra ireo dahalo. Tsy afa-niverina ireo olon-dratsy tamin’izany satria efa nanaraka avy aoriana ihany koa ny mpitandro filaminana sy ny fokonolona. Raikitra ny fifandonana ary namoy ny ainy ny dahalo iray fa ny namany miisa 11 kosa tafaporitsaka tany anaty ala mikitroka ka tsy tratra. Araka ny fantatra dia efa tena mirindra tanteraka ny andraikitra nankinina amin’ny vondron’olona rehetra any Ivohibe ary efa nahazo fiofanana mifanaraka amin’izany avokoa izy rehetra.

Dom