Tsy mitsaha-mitombo ary miha mahazo vahana hatrany ny vaky trano amin’izao fotoana ary efa tsy mifidy toerana hanatanterahana izany intsony ireo jiolahy. Trano iray indray àry no lasibatry ny jiolahy miisa enina nirongo basy sy antsy lava ny sabotsy lasa teo tany amin’ny faritra Vakinakaratra tao amin’ny fokontany iray antsoina hoe Ambatondradama ao amin’ny kaominina Anjoma Ramartine tokony ho tamin’ny 12 ora alina. Araka ny vaovao azo dia efa nihaodihaody teny amin’ny manodidina nisava lalana ny sasany tamin’ireo mpamaky trano ireo ary maro no milaza fa olona eny an-toerana ihany ireo mpanome vaovao. Niandry ho maizina sy mangina tsara ireto olon-dratsy vao nianika ny tamboho ary niroso avy hatrany tamin’ny famohana ny varavarana. Henon’ilay tompon-trano anefa ny feon’ny fanalahidy nopitsohan’ireo mpanao ratsy ka nidina ny fandriana nijery ny zava-misy avy hatrany ity farany. Vao tafiditra ny trano anefa ireto jiolahy dia ny endriny no tazan’izy ireo ka namely azy avy hatrany tamin’ny famaky ny iray. Naratra mafy araka izany teo amin’ny faritry ny tratrany sy ny tanany. Basim-borona iray monja anefa no mba lasan’ireo jiolahy. Ilay raim-pianakaviana kosa nalefa avy hatrany eny amin’ny hopitaly notsaboina. Efa manohy ny famotorana amin’izao fotoana izao ny zandarimaria ao Mandoto.

Ra Tax.