Lasa resaka politika sy fifanandrinan’ny samy manam-pahefana ny asan-jiolahy nitranga tany Ilakaka tamin’iny volana aogositra iny. Tratra mantsy ireo 3 lahy voarohirohy tamin’ny fanafihan mpandraharaha ka efa naiditra am-ponja nefa voalaza fa misy tompon’andraikitra manao fanelanelanana hamoahana azy ireo. Tsy manaiky izany kosa anefa ny fitsarana izay mitandro ny fahaleovan-tenany tanteraka. Eo no voalazan’ny mpampahalala vaovao avy any an-toerana fa mampisy ny fifandirana eo amin’ny samy manam-pahefana. Hita fa tsy faly amin’ilay tompon’andraikitra voalaza fa mpanao fanelanelanana ny mpandefa vaovao avy any Ilakaka ary tsy manaiky mihitsy ny fanaparam-pahefana. Raha tsiahivina dia ny zoma lasa teo no nandalo fampanoavana ireo voarohirohy tamin’ny fanafihana mpandraharaha ary ny sabotsy kosa no nalefan’ny mpitsara any amin’ny fonjan’Ihosy. Fantatra fa volabe an-jatony tapitrisa no lasan’ireto mpanafika ireto. Mbola olana goavana any amin’ny toerana lavitry ny renivohitra ny fahefana be eo ampelatan’ny tompon’andraiki-panjakana izay sahy manome baiko ny ambaratongam-pitantanana hafa.

Dom