Miditra amin’ny fandiovana ny tanàna ny eo anivon’ny kaominina Antananarivo renivohitra. Nirotsaka amin’ny famafana lalana ny ekipa manokana mba hanatanteraka izany. Olona miisa 70 no karamaina izay ahitana mpamafa lalana, mpanadio tatatra, mpiasan’ny tsena ary polisy monisipaly. Haharitra 15 andro ity hetsika ity ka teny amin’ny boriboritany fahefatra, izany hoe, manodidina an’i Soanierana iny omaly. Tafiditra amin’izany ny fanalàna fako sy ny fotaka izay manentsina ny lakan-drano, fanamboarana ireo tatatra izay nahitana fahasimbana, famafana sy fanalàna ireo bozabozaka sy fakofako teny amin’ny sisin- dalana, fandaminana ny fifamoivoizana, fanentanana ireo mpivarotra sy ny mpandeha tongotra mba hanaja ny fahadiovana. Tanjona mandritra izao hetsika izao ny hoe : « Antananarivo madio », eo ihany koa ny fiomanana amin’ny fiavian’ny fotoam- pahavaratra.

Dom