Tsy mitsaha-mirongatra ny halatr’omby etsy sy eroa, hany ka mandry tsy lavo loha ny vahoaka. Tokantrano iray tany Avaratr’Imahatsinjo, fokontany Ambohitratoko, distrika Ambatomainty, kaominina ambanivohitr’Ankazondandy indray no nisy nanafika tamin’ny 09 oktobra lasa teo, tokony ho tamin’ny 10 ora sy sasany alina. Jiolahy miisa 06 izay nitondra kalachnikov tsirairay avy no nanao tampim-baravarana tao an-tanàna sy nanapoaka basy, araka ny vaovao avy any an-toerana. Nirefodrefotra ny basy tamin’ny fandalovan’ireo dahalo tao an-tanàna ka tsy nisy sahy nivoaka nanohitra azy ireo ny mponina, indrindra fa ireo mpifanolo-bodirindrina tamin’ilay lasibatra. Omby miisa 12 no indray voafaokan’ireo malaso tamin’izany. Nanohitra ny herisetran’ireo olon-dratsy ny raim-pianakaviana tao amin’ ity tokantrano ity tamin’ny fiarovany ny fananany ka voatifitra teo amin’ny sandriny. Taorian’ny fahalasan’ireo olon-dratsy vao sahy nampandre ny mpitandro filaminana ny fokonolona. Zandary maromaro avy ao Andriampamaky no nanao ny fanarahan-dia ka tafaverina ihany ireo omby rehetra saingy tafaporitsaka kosa ireo dahalo. Mitohy ny fikarohana.

Anna Ra.