Ny Alarobia 05 oktobra lasa teo tokony ho tamin’ny 09 ora sy sasany alina dia tovolahy iray 16 taona no novonoin’ny andian-jiolahy miisa enina tany Tanambao I, Antsiranana. Nisy ny fanadihadiana nataon’ireo polisy tany an-toerana, izay nahafantarana fa manodidina ny 13 ka hatramin’ny 19 taona ireo voarohirohy tao anatin’izany. Ny roa tamin’izy ireo kosa dia voasambotra omaly maraina. Raha araka ny loharanom-baovao voaray dia valifaty no antony fototra namonoana io tovolahy io satria an-dalana handeha hody any an-tranony izy no notsatohin’izy ireo tamin’ny antsibe ny lamosiny sady natotan’izy ireo tamin’ny tany ny lohany. Nanambara ny lehiben’ny polisy tany an-toerana fa tsy vao voalohany no nitranga ny asa ratsin’ireo olon-dratsy ireo, satria mbola voarohirohy tamin’ny famonoana tovolahy iray tamin’ny volana martsa sy ny fanendahana zaza tsy ampy taona roa ny 06 oktobra lasa teo izy ireo. Nilaza hatrany ny lehiben’ny polisy fa samy  tsy misy  mipetraka amin’ny ray aman-dreniny izy roalahy ireo sady tsy mianatra intsony koa. Araka izany, ny andavanandrom-piainany dia ny mifindra eny amin’ny faritra samihafa hanaovana ny asa ratsy.  Mbola mitohy ny fikarohana ireo andian-jiolahy efatra hafa.

Anna Ra.