Anisan’ny biby voaaro ny soka-dranomasina ka tokony tsy ho azo jonoina, mety hampidi-doza koa anefa ny fihinanana ny henany noho ny fisian’ireo hazandrano voapoizina ka mampidi-doza ho an’ny olombelona. Nisambotra maromaro anefa ny mpanjono Mahambo, tany Fenoarivo Atsinanana ka namidiny mora dia mora teny an-tsena izany ny alakamisy lasa teo. Nifandrombahan’ny olona àry ity hena hafa kely ity satria dia malaza matsiro tokoa. Ny ampitson’io andro io ihany anefa dia olona maro no narary vokatry ny fihinanana azy, ary nisy tamin’ireo ny renim-pianakaviana mbola mampinono. Vokatr’izany dia zaza 5 latsaka ny 2 taona no voapoizina avy amin’ny nonon-dreniny ka maty ny 4 tamin’izy ireo, ny iray kosa avotra soa aman-tsara. Maro koa ireo mbola manohy fitsaboana any amin’ny hopitaly.

Ny Tsiky R.