Nongotan’ireo fokonolona omaly maraina ireo vatobe miisa valo izay natsatoky ny fianakaviana iray teo afovoan-dalana, ao anatin’ny fokontany Ambatobe afovoany, boriboritany fahadimy. Nanala izany teo imason’ny lefitry ny sefo fokontany sy ny solombavam-bahoaka Naivo Raholdina izay fantatra ihany koa fa filohan’ny vaomiera mpanadihady ny olan’ny fananantany ao anivon’ny antenimieram-pirenena izy ireo. Fianakaviana maherin’ny 200 no niara-nanao sonia ny taratasy fanoherana izany fanakanana izany. Araka ny loharanom-baovao voaray dia tsy nahazo fahazoan-dalana ara-panjakana hanao izany fanapenan-dalana izany ilay mitonona ho tompon-tany. Saingy an’avona kosa no nanazavany tamin’ny besinimaro fa nahazo izany alalana izany tamin’ny sefo fokontany teny an-toerana izy. Ity farany izay milaza fa taratasy fampahafantarana fa tsy taratasy fahazoan-dalana no voarainy. Afa-pahasahiranana kosa ireo mponina taorian’izany fanesorana ireo vato ireo izany satria araka ny loharanom-baovao hatrany dia efa dimampolo taona mahery no lalam-pokonolona io lalana Ambatobe io, ary sambany vao nisy izany fanakanana izany.

Anna Ra.