Tsy mitsaha-mitombo ireo olona sahaninin’ny tendron’ny Cnaps ao Fenoarivo- Atsinanana. Nisokatra tamin’ny fomba ofisialy ny  masoivoho raha toa ka niankin-doha tamin’ny Toamasina  izany teo aloha.   Raha toa ka ny fandraisana taratasy sy ny fizarana fanampiana fotsiny no nataon’ny tendrony teo aloha, vita ao an-toerana daholo ny asa rehetra ankehitriny. Mahatratra  663 ny mpiasa sahanina ary 199 ny mpampiasa voasoratra. Rasoazanatsimba Landy no voatendry ho lehiben’ny masoivoho, ary Razanakolona Hoby Fetra no talen’ny vola. Ity Masoivohon’ny Cnaps ao Fenoarivo Atsinanana ity no hiahy ny tendron’ny Cnaps any Sainte-Marie sy ny any Maroantsetra.

Tonga nametraka ity Masoivoho ity tamin’ny fomba ofisialy ny minisitry ny asam-panjakana, ny asa sy ny lalàna sosialy ary ny fanavaozana ny raharaham-panjakana. Ny talen’ny fitantanana eo anivon’ny Cnaps foibe Rakotomila no nisolotena ny tale jeneraly. Nambarany fa “tafiditra anatin’ny politikan’ny toniam-pitantanana ny  fanakaikezana ny mpanjifa. Eo ihany koa ny fanatsarana ny fomba fiasa ary amin’izao fanamarihan’ny Cnaps ny faha-60 taona nisian’ny fiahiana ara-tsosialy izao dia notsiahiviny ireo ezaka vita toy ny fampitomboana ireo tolotra hiakatra 100% ho an’ny fanampiana ny fianakaviana ary 20% ny fisotroan-dronono  sy ny vidin-takaitra.   Eo  ihany koa ny telovolan’ny Cnaps tsy hifarana raha tsy ny 31 desambra izao, hetsika hanafoanana ny tataon-tsazy 10% amin’ny fanefana ireo latsakemboka mbola tsy voaefa teo aloha. Ho fanampiana ny mpampiasa toy ireo kaominina izay manana trosa betsaka amin’ny latsakemboka”.

Safidy Andrianina