Mitera-doza ary ahitana zavatra mamoafady tokoa ao amin’io fitaovan-tserasera iray malaza amin’izao fotoana izao io na ny « Facebook » izany. Isan’andro dia ahitana tranga hafahafa ary mahatsikaiky hatrany ao ary maro amin’ireo mpanjifa mihitsy no tohina amin’izany. Tsy vao ela akory no nisy horonantsary mamoafadin’olo-malaza iray niparitaka ary niteraka resa-be tao amin’ny facebook. Ny fanaon’ireo mpampiasa ity fitaovan-tserasera ity moa dia ny manaparitaka avy hatrany ireo vaovao mahaliana any amin’ireo atao hoe vondrona na « Groupe » ireny hany ka ao anaty minitra vitsy monja dia efa mahafantatra azy daholo ireo mpikirakira aterneto rehetra. Ny alatsinainy lasa teo indray dia voalaza fa sarina zazavavy kely iray no naparitaky ny olona tao. Sary miboridana maromaro izany araka ny vaovao azo dia sary nifampizarany tamin’ny sakaizany tao amin’ny facebook ihany. Tsy hay anefa izay nahatonga azy ireo niparitaka fa dia feno ny sariny teny amin’ny fandraisana na « accueil » ary toy ny mahazatra dia naparitaky ny olona ireo sary ary niteraka resa-be. Tsy ela akory dia tonga teny an-tsofin’ilay zazavavy ny resaka ka teo vao nikoropaka izy nitady izay fomba hamafana ireo fizarana izay efa nihoatra ny arivo isa ankoatra ny fanehoan-kevitra izay efa aman-jatony ihany koa. Tao anatin’ny fotoana vitsy ihany koa dia efa hitan’ireo namana sy havana ireo sary ka niantso ny Ray aman-drenin’ilay zazavavy izy ireo. Ity farany izay mbola tany am-pianarana tamin’io fotoana io ka tsy mbola noresahina ny zava-misy. Natahotra mafy noho izany ilay zazavavy tompon’ireo sary ka nanapa-kevitra ny hamono tena. Araka ny vaovao azo dia niafina izy niditra ny efitranony ary avy hatrany dia nihinana fanafody maromaro. Soa ihany anefa fa tratran’ny reniny teo am-panaovana izany izy ka nentina avy hatrany tany amin’ny hopitaly. Avotra soa aman-tsara ihany ny ainy.Mampidi-doza ny  fampiasana ny fitaovan-tserasera rehefa tsy ampy fiheverana ka mila fandinihana sy fitandremana fatratra.

Ra Tax.