Miha maro ireo mpivarotra rongony amin’izao fotoana izao ary efa ahitana azy avokoa eny rehetra eny. Raha any anelankelan-trano miafina matetika no tena ahitana azy ireny dia efa tsy miafina intsony izy amin’izao ary efa misehoseho eny amin’ny fiarahamonina mihitsy aza ny sasany. Mpamatsy rongony ao Antanjombava, kaominina Talatamaty ao amin’ny distrika Ambohidratrimo no tra-tehaka ambodiomby ny talata lasa teo. Taorian’ny fikaroham-baovao samihafa efa nataon’ny mpitandro filaminana dia fantatra fa mivarotra rongony ao an-tranony ny lehilahy iray izay voalaza fa mpamatsy zava-mahadomelina ao an-tanàna. Tsy niandry ela ny manam-pahefana tamin’izany fa rehefa nahazo alalana avy amin’ny fitsarana dia nirotsaka an-tsehatra nisava ny tranon-drangahy izay tsy nanaiky ny hisavana ny trano fonenany. Tratra soa aman-tsara tao an-tranony moa ilay tompon-trano noho ny fisavana natao vao maraina be tamin’ny 5 ora. Nahitana rongony milanja 500g tao anaty fonosana miisa 97 sy 1 kilao niafina tao an-tranony. Noho ny fahatratrarana ireo zava-mahadomelina ireo tao aminy dia notazomina ilay tompon-trano ka ny borigady Talatamaty no miandraikitra ny fanadihadiana.

Ra Tax.