Tsy diso anjara tamin’ny fiofanana fampahafantarana ny rehetra momba ny lalàna mifehy ny asa sy ny lalànan’ny fiahiana ara-tsosialy ny distrikan’i Fenoarivo-Atsinanana. Naharitra roa andro ny fiofanana, ka nitarika izany ny lehiben’ny sampan-draharaha Sass Randrianarijaona Charles Emilson sy ny ekipany. Voakasik’izany ny sehatra ankapobe, ny fampianarana, ny fiangonana, ny asa an-tsambo, ny asa an-trano. Araka ny lalàna velona dia ireo mpiasa amin’ny sehatra tsy miankina sy ny mpiasa Ecd amin’ny fanjakana no ahian’ny Cnaps. Nampahafantatra ireo andinin-dalàna mifehy ny fiahiana ara-tsosialy toy ny tsy maintsy ampidirana ny mpiasa ho mpikambana Cnaps 15 andro aorian’ny nandraisana azy, ny fanefana ny latsakemboka sy ny fanaovana fanambaràna filazan-karama isaka ny telovolana, ny fomba fanaovana fangatahana ny fanampiana any amin’ny Cnaps, ireo tombotsoa azon’ny mpampiasa amin’ny fampidirana ny mpiasany ho mpikambana ao. « Zava-dehibe daholo ny fiofanana na ilay mikasika ny satan’ny asa, na ilay mikasika ny lalànan’ny fiahiana ara-tsosialy, mbola tsy feno ny fahalalako teo aloha, ka ny fiofanana no nahafahako nampitombo ilay fahaizako mba hahafahako mitantana tsaratsara kokoa ny mpiasako amin’ny manaraka », hoy Jerry Laurent Edouard mpandray anjara tamin’ny fiofanana.  Notsiahivina nandritra ny fiofanana ny hetsika telovolan’ny Cnaps, fanomezana atolotry ny Cnaps ny mpampiasa amin’ny fanamorana amin’ny fanefana ny latsakemboka ary foana amin’izany ny sazy sy ny tatao 10%. Nanomboka ny 01 oktobra teo izany ary tsy hifarana raha tsy ny 31 desambra ho avy izao. Hetsika izay tafiditra indrindra amin’ny fanamarihana ny faha-60 taona nisian’ny fiahiana ara-tsosialy teto Madagasikara.

S.A