Daty manan-tantara eo amin’ny fiainam-pirenena malagasy ny herinandron’ny 22 hatramin’ny 24 novambra 2016. Malaza maneran-tany ny fandraisan’i Madagasikara ny fihaonan’ny firenena miteny amin’ny am-pahany na manontolo ny teny frantsay. Efa ela izay nanirian’ny mpitondra Malagasy handray ity fihaonana faratampony ity izay fa izao izany vao hotanteraka. Mifanindra an-dalana amin’izay ihany koa ny fihaonam-be nasionalin’ny Ffkm na ny Fiombonan’ny Fiangonana Kristianina eto Madagasikara. Tsy hoe akory tsy manaja vahiny ireo raiamandrenim-piangonana mivondrona ao amin’ny Ffkm fa daty efa voapetraka mialoha ihany koa ny 22 hatramin’ny 27 novambra ho avy izao hanatanterahana izany, izay hatao any Toamasina. Toy izao ny fandaharam-potoana mandritra io herinandro io : 22 novambra fahatongavan’ny mpikatroka rehetra, 23 novambra fiofanana ekiomenika sy fijoroana vavolombelona ataon’ireo raiamandreny rehetra izay efa nandalo tao amin’ny Ffkm ka ny ataon’izy ireo amin’izany dia ny mahakasika izay fomba niainany ny ekiomenisma. Ny 24 novambra kosa dia mahakasika ny tatitra avy any amin’ny faritany isan-tokony avy sy ny asam-baomiera. Raha efa izany rehetra izany, izay vao mitohy amin’ny fivoriam-be ny fotoana hamoahana ny fehin-kevitra rehetra. “Ianareo no sira sy fanazavàna ho an’izao tontolo izao” (Mt 5, 13-14). Io no teny manentana hoentina hiatrehana io fihaonana nasionaly io.

Tahirisoa