Anisan’ny aretina iray mbola tena mamono olona betsaka eto Madagasikara ny tefoedra na « fièvre typhoïde ». Hatreto anefa dia tsy mbola misy antontan’isa mazava mikasika ny olona mitondra ny otrikaretina « sarmonelatifi » izay mahatonga ny tefoedra ao amin’ny vatana. Ny hafanana be mihoatra ny 37° eo amin’ny vatana  sy 38° eo amin’ny sofina, miampy fivalanana no nentina naminavina hatramin’izay fa voan’ny tefoedra ny olona iray. Fomba iray tsy voamarina anefa io ka mety hisy fiantraikany hafa amin’ny marary. Mihazakazaka be rahateo ny fihanak’io otrik’aretina io rehefa tafiditra ao anaty vatana ka mety hamono haingana. Amin’izao fotoana izao, araka ny vaovao azo dia mandripaka ary tsy mifidy sarangan’olona ity aretina ity fa izay voa dia mandamaka avokoa. Olona 2 amin’ny 10 marary miditra hopitaly no voan’io aretina io. Marihina fa aretina azo avy amin’ny loto izy ity ary misoko mangina izay miteraka fahafatesana raha tsy misy fitsaboana.

Ra Tax.