Nitrangana haintrano mahatsiravina indray tao amin’ny fokontany Mangarivotra, 21/53, carreau 7, Toamasina, ny harivan’ny alarobia 23 novambra lasa teo, tokony ho tamin’ny 4ora sy sasany. Ambin’afo tao am-patana avy amin’ny tokantrano iray no nipoiran’ny afo ka niparitaka malaky tamin’ireo trano manodidina, ny andro koa moa mafana be rahateo ka tsy hay nofehezina ny fijoalajoalan’ny lelafo, noho ny herin’ny fiparitahan’ny afo dia nahatratra 52 tafo ny trano indray natelin’ny afo. Maherin’ny 200 isa ny olona traboina tsy manan-kialofana, ary potika tsy nisy azo noraisina avokoa ny entana maro tsy tafavoakan’ny tompony tamin’ireo trano fonenana. Marihina fa saika ireo trano vita amin’ny hazo sy ravim-pontsy ny ankamaroan’ireo trano hotohoton’ny afo ireo. Naharitra ora efatra ny firedaredan’ny afo ka efa tamin’ny valo ora sy sasany alina vao maty tanteraka izany. Tonga ara-potoana ny  mpamonjy voina teo anivon’ny kaominina renivohitry Toamasina notarihin’ny Kolonely Charles Desiré. Ity farany izay nidera sy nisaotra manokana ny fokonolona, tamin’ny fiaraha-mientan’ny rehetra nanampy ireo mpamonjy voina teo am-panatanterahana ny asa famonoana ny afo. Tsy mbola fantatra mazava tsara kosa hatramin’izao ny tetibidin’ny zavatra potika sy samba rehetra. Tsy nisy kosa ny aina nafoy, fa lehilahy lehibe iray no safotra tampoka teo am-pahitana ireo trano hotohoton’ny afo ka voatery nentina notsaboina malaky teny amin’ny hopitalibe Toamasina.

ZOUZOUH Toamasina