Ekena ary tsy misy ady hevitra fa voararan’ny lalàna ny fivarotana amoron-dalana eto an-drenivohitra. Hita fa miha madio ny tanàna satria tsy dia misy intsony ireo mpivarotra izay nesorina vonjy maika miaraka amin’ireo mpangataka aman-jatony. Mbola maro ihany anefa ireo mpivarotra izay mijanona eo amin’ny toerana mahazatra azy ary miandry fanenjika amin’ireo polisy. Ireo mpivarotra voankazo sy ranom-boankazo ary ireny kojakoja majinika ireny no tena mibahana eny. Rehefa tezitra tamin’izany ireo polisy nasionaly mihaodihaody eny amin’ny manodidina dia nidina ka nandrahona ireo mpivarotra. Tsy vitan’ny nandroaka ny entan’ireo mpivarotra tsy tafatsoaka anefa izy ireo fa mbola nandrahona tamin’ny vodim-basy ihany koa. Ireo mpivarotra sasany tafatsoaka indray dia mbola mananihany azy ireo, vao mainka nampiakatra ny hatezeran’ireo polisy. Rehefa lasa anefa ireto farany dia miverina mamelatra entana ihany ireo mpivarotra dia raikitra indray ny fifanenjehana. Miteny mihitsy aza ireo polisy amin’izany hoe « Ho avy izahay ary ataovy tratranay eo ». Fiteny izay tsy tokony hivoaka ny vavan’ny manam-pahefana, izay tokony ho fitaratra eny amin’ny fiarahamonina. Ankoatra izany anefa dia misy ireo  mpivarotra mitaraina fa misy manao kolikoly ny sasany amin’ireo polisy. Mpivarotra baiboly iray mitoby eo anoloan’ny tranoben’ny Antenimeram-pirenena eo Anosy no saika nodarohan’ireo polisy roalahy. Nanala azy tao amin’ny toerany ireo polisy ary tsy nanaiky ny hiala ity raim-pianakaviana. Nilaza ihany koa izy fa maro ireo mpivarotra tsy esorin’izy ireo anefa efa nijanona efa hatramin’ny maraina teo. Izy anefa vao namelatra entana dia efa avy ireo mpitandro filaminana manala azy.

Ra Tax.