Nitrangana haintrano mahatsiravina indray tao amin’ny tanàna iray mitondra ny anarana Ambohitsara, ao amin’ny kaominina Nosy Varika ny harivan’ny sabotsy lasa teo. Raha ny fampitam-baovao azo avy any an-toerana, trano manodidina ny 400 isa no may kilan’ny afo ary olona mahery ny 1020 no tsy manan-kialofana amin’izao fotoana izao. Tokony ho tamin’ny 4 ora sy sasany hariva teo ho eo no nanomboka ny fahamaizana. Raha ny fantatra dia trano kely iray tany an- toerana no fantatra fa niaingan’ny afo, izay mbola tsy mazava hatreto ny tena antony. Tao anatin’ny fotoana fohy monja dia nijoalajoala ny afo ary niampita tamin’ireo trano rehetra manodidina. Nahery rahateo ny fitsokan’ny rivotra ka nanamora ny fiparitahan’ny afo. Raha ny voalazan’ireo niharam-boina dia mitentina 60 tapitrisa ariary ny entana ravan’ny afo tamin’izany. Ankehitriny moa dia betsaka amin’ireo olom-pirenena, indrindra fa ireo mpanara-baovao, no mametra-panontaniana amin’ity haintrano mahatsiravina tsy misy fiafarany eto amin’ny firenena ity. Tamin’ity indray mitoraka ity dia tsy nisy ny olona maty raha toa ka mamono olona hatrany ny haintrano tato ho ato. Mazava ho azy fa ankoatra ireo olona maty ireo dia maro ihany koa ireo harena sy fananana may kila forehitra. Tsy fitandremana tokoa ve sa mety misy ambadika hafa ny fahamaroan’ny haintrano eto amintsika? Na ny eto an-drenivohitra, na ny any amin’ny faritra. Saika ho isan-kerinandro no aharenesana fahamaizana trano maro tahaka ity nitranga tany Ambohitsara – Nosy Varika ity. Ny azo atao angamba sisa dia ny mitandrina fatratra amin’ny afo ao an-tokantrano.

Ra Tax.