Tsy zotra iray na roa no tsy manaja mpandeha fa maromaro . Vao tsy ela izay no nisy taksibe mampitohy an’Ambolokandrina sy Ampefiloha no tsy nanaraka ny lalana tokony handehanany fa avy hatrany dia nihazo an’Ankazotokana. Nahavoadona raim-pianakaviana nandeha bisikileta ary tsy mba nijanona akory fa nandeha nanohy ny diany hatrany na dia tsy naratra aza ilay rangahy. Omaly indray dia taksibe iray ao amin’ny kaoperativa Mitsinjo 144, mampitohy an’Ambohimahitsy sy Analakely no nanome fanafitohinana sy nampatezitra ny mpandeha tao anatiny. Tsy manana fahazoan-dalana miakatra eo Mangasoavina ity zotra ity fa tsy maintsy manaraka ny Besarety izay vao miakatra Andravoahangy- ambony.  Tsy mba nisy era sy dinika anefa fa avy hatrany anefa dia navilin’ilay mpitatitra niakatra an’I Mangasoavina ny fiara ary nihazo an’Ampahibe dia nihodina tany Bel’air. Teo anatrehan’izany, tezitra ny mpandeha satria ny tsy fahalalam-pomba mahazatra azy ireo hatrany no nasehon’izy ireo ny mpandeha. Tsy mba nisy ny fanajana na dia teny kely mba fiangaviana fa izy ireo indray no mivatravatra tamin’ny mpandeha. Tsara hotsindrina fa avy ny orana talohan’io fotoana nandalovana teo. Saingy tsy nisy rano niakatra kosa teo Besarety rehefa notazanina avy eny Andravoahangy ambony satria izay no antom-panazavana nomen’izy roalahy ny mpandeha.  Vokany, saika novonoin’ny olona ilay mpamily, tao ny naka ny takela-panondroana ny toerana iantsonana. Ilay tovolahy mpanampy ny mpamily kosa nandositra avy hatrany rehefa tonga teo amin’ny Rasalama.  Mila miray hina ny tompon’andraikitra amin’ireny kaoperativa ireny ary mampianatra fahalalam-pomba sy fahaiza-miaina ny mpamily sy ny mpanampy azy mba hisorohana ny fifandonana amin’ny mpandeha.

Farah