Loza mitatao efa an-taonany maro ho an’ny mponin’i Mantasoa ny faharitran’ny farihy be izay azo lazaina manana anjara asa lehibe eo amin’ny fiveloman’izy ireo. Efa taona maro mantsy izay no efa nampiasain’ny orinasa Jirama io farihy io angalana herinaratra. Iaraha-mahalala anefa fa mandoto ny farihy izany fitrandrahana izany ary tsy vitan’izany fa mandritra ny rano ihany koa. Ankehitriny ary dia mitaraina ny mponina fa manova zavatra maro eo amin’ny fiainan’izy ireo io faharitran’ny rano io satria simba tanteraka ary tsy misy vanona ny voly rehetra noho ny fahamainan’ny tany. Ny ankamaroan’ny mpamboly mantsy dia tsy mandeha alavitra fa eo amin’io farihy io ihany no matsaka rano hanondrahana voly. Tsy vitan’izany fa mbola ireo mpiompy trondro vazaha ao Ampasipotsy ihany koa no manjaka any an-toerana. Enjehina fatratra mantsy ireo mpanjono amin’izao fotoana izao satria hoe tsy mbola misokatra ny vanim-potoana fanjonoana sy anaratoana. Ireo vahiny kosa anefa mahazo vahana soa aman-tsara migoka ny vokatra azo avy amin’ny farihy. Ny tena mahasosotra mantsy rehefa lany ny trondro vao mahazo alalana hanjono ny mponina. Sady tsy hisy rano hosotroina izany atsy ho atsy ny mponina no tsy hahavanona vokatra intsony. Ny tena mampalaelo dia toerana anisan’ny tsara no akaiky azo itsangatsanganana i Mantasoa. Mampalahelo fa simba ny tontolo iainana, may ny tanety ary ho ritra ny rano izay foto-piveloman’ny olona rehetra ao Mantasoa. Rano sy ny ala no misarika ny mpizahatany, toerana izay sady tena azo lazaina fa akaiky satria 60 km fotsiny  ary lalana ora 2. Tao anatin’ny 2 taona lasa mantsy izay dia mbola maizina ala ny lalana, mbola feno rano izay jerena rehetra fa amin’izao dia mampatahotra fa ngazana.

Ra Tax.