Fomba hafa indray no ampiasain’ireo mpanendaka amin’izao fotoana mahabetsaka olona mivezivezy eny an-tsena izao. Miray tsikombakomba amin’ny mpamily fiarakaretsaka izy ireo mba hialany amin’ny mety hisian’ny mpitandro filaminana manara-maso sy ny fitsaram-bahoaka. Arahin’ireo mpanendaka izay olona heveriny fa manam-bola ary efa misy taxi miandry eny akaikikaiky eny. Rehefa mandalo eo amin’ilay fiara ilay olona dia ambanan-dry zalahy ny antsy ary tereny hiditra ao anaty fiara. Miainga ilay fiarakarestaka avy eo ka eny am-pandehanana no manao ny fanendahana ao anaty fiara ry zalahy. Fantatra fa vehivavy iray nanao firavaka volamena no efa voa teny Analakely. Tsy nisy nahatsikaritra mihitsy ny nanosehan’ireo jiolahy azy tao anaty taxi na dia maro aza ny olona teny an-toerana no nivezivezy sy niantsena. Teny Antaninarenina vao najanon’ireo jiolahy ny fiara ary natosik’ireo mpangalatra teny ivelany ilay ramatoa rehefa voaroban’izy ireo. Lasa nanohy ny diany kosa ilay fiara avy eo ary tsy hita izay nalehany.

Mila mailo ihany ny rehetra amin’izao fotoana izao satria ny ratsy tsy kely lalana. Na dia efa mitandrina mafy sy mihevitra ny tsy hanaiky manoloana ireo mpanao sinto-mahery sy mpangarom-paosy aza mantsy dia mbola maro ihany no voa. Efa misy miofana amin’ny fomba maro samihafa mihitsy ireo tontakely mpivezivezy eny Analakely mba hanamoran’izy ireo ny asa fanendahana.

Dom