Haintany, haintrano, horohorontany, fitsaram-bahoaka, fanafihan-dahalo sy jiolahy…. Tsy misy fotoana izay tsy aharenesana ny iray amin’ireo tranga ireo ao anatin’ny iray volana mba tsy hilazana hoe herinandro na isan’andro eto Madagasikara. Tena fiainana anaty olana ny fiainan’ny vahoaka malagasy ankehitriny. Tsy mba misy vaovao tsara sy mitondra filaminan-tsaina fa dia tebiteby sy fitaintainana lava no heno etsy sy eroa. Ny harem-pirenena anjakan’ny vahiny.  Ny fananana izay nohariana tao anatin’ny taona maro levon’ny afo ao anatin’ny indray mipi-maso noho ny haintrano tsy am-poizina. Mijaly ny vahoaka malagasy. Tamin’ny 10 janoary 2017 tamin’ny mitatao vovonana dia  trano 52 tafo no levon’ny afo tany Mangaoka, ao amin’ny fokontany sy kaominina ambanivohitry Ranomafana atsinanana, distrikan’i Brickaville. Vokany, olona 86 no traboina sy tsy manan-kialofana. Tombanana hatrany amin’ny 2,4 tapitrisa ariary ny tetibidin’ny entana may. Mbola tsy fantatra kosa izay niatombohan’ny afo. Efa nidina ifotony ny zandary  any an-toerana nijery ny zava-nitranga. Mandeha ny fikarohana izay nahavaona.

Farah