Dia gaga sy talanjona avokoa ny rehetra mahita ity fantsona vaky etsy Ambohijatovo ambony, izay tsy lavitra akory ny Foiben’ny Jiro sy Rano malagasy. Efa hatramin’ny alahady alina no mikararana manaraka ny arabe ny rano noho io fantsona vaky io ary tsy mahataitra ireo mpiasan’ny Jirama akory ny mba handray andraikitra mifanandrify amin’izany amin’ny fanamboarana tokony hataony. Sa miandry hantsoina foana toy ny mahazatra ve vao mandray andraikitra na eo akaiky eo aza. Nefa na hiantso aza  moa raha tsy ny lehibe avy hatrany no mamaly tsy hahita mpiasa hipoitra hanatanteraka ny asany akory. Rehefa hanapaka jiro sy hanongotra kaontera ihany no tena mailaka tanteraka ny mpiasan’ity orinasa ity.

Sarotra ny hilaza fa tsy misy mpiasa na iray aza mandalo eo ka tsy mahatsikaritra ity rano migodàna manaraka ny arabe ity. Efa roa andro anefa izay no very manaraka ny arabe izany rano izany.  Tsy mahagaga raha toa ka miseho ny tranga tahaka izao. Ankoatra ny doro-tanety, izay maharitra ny rano dia sarotra ihany koa ny tsy hilaza ireo jiro sy rano izay mikarakara any amin’ny toeram-piasanan’ny mpiasam-panjakana. Ohatra amin’izany ny eny amin’ny Oniversitem-panjakana, izay mandeha dia mandeha tokoa ny rano eny amin’ny paompy izay efa tsy misy « robinet » intsony ny ankamaroany na eny amin’ny trano fidiovana io na eny amin’ny toerana fanasan-damba.  Hany ka ny vahoaka madinika hatrany no atao mibaby ny saran’izy ireny.

Safidy Andrianina