Azo lazaina fa mora ny mahazo ny mari-pahaizana bakalorea rehefa tena miezaka ny mpianatra fa ny hanohizana ny fianarana aorian’izay no tena manahiran-tsaina ny maro. Mbola maro amin’ireo mpianatra afaka bakalorea tamin’ny taona 2016 teo no mbola tsy mahita fianarana ankehitriny ary sahiran-tsaina amin’ny fisafidianana ny toerana hianarana sy ny sampam-pampianarana tokony harahina. Maro amin’ ireo ankizy nahazo diplaoma bakalorea ireo ihany koa no nanao fifaninanana hidirana taona voalohany teny Ankatso sy ny oniversitem-panjakana maro fa tsy nahomby ka mitady ny toeram-pianarana ambony mifandraika amin’ny safidin’izy ireo.

Noho io ireo antony ireo indrindra no nahatonga ny Ajeem (Association des jeunes enseignants et étudiants de Madagascar) hanatanteraka ilay hetsika « salon de l’orientation et guide des études supérieures » andiany faha iraika ambin’ny folo etsy amin’ny Tahala Rarihasina Analakely, izay haharitra 2 andro, nanomboka omaly alarobia 01 febroary ary hifarana anio amin’ny 4ora sy sasany hariva. Ahitana mpandray anjara 15 moa ity hetsika ity ary sampam-pampianarana maherin’ny 30 eo ho eo no mandray anjara ao. Mandritra ny hetsika dia hisy ny fisarihana hatao ka izay mpianatra tsara vintana dia hahazo vatsim-pianarana maimaimpoana hianatra amin’ny toeram-pianarana  ambony iray izay mandray anjara amin’ity hetsika ity. Marihina fa maimaimpona ihany koa ny fitsidihana ny hetsika.

S.M