Anisan’ireo mpanohana ny federasionina malagasy ny athletisma ny brasserie star mandritra ny hetsika «  Hazakazaka ho an’ny rehetra », izay karakarainy ny alahady 5 febroary ho avy izao. Ankoatran’ireo fanampiana amin’ny zava-pisotro izay hoentin’izy  ireo, toy ny rano fisotro, dia mpiasa 60 be izao no handray anjara amin’ny hazakazaka miaraka amin’ny daholo be amin’io alahady io. Marihina fa ity hetsika ity dia misokatra ho an’ny rehetra na olon-tsotra na ireo efa matianina izay hanokatra ny hetsika amin’io fotoana io. Marihina fa mihodina indroa ny Lac Anosy ity hazakazaka ity izay entin’ny federasionina manokatra ny taom-pilalaovana ary anentanany ihany koa ny besinimaro mba hanao fanatanjahantena. Mpandray anjara arivo mahery no antenaina ho tonga amin’io fotoana io. Misokatra hatrany moa ny fisoratana anarana eny an-toerana ny andron’ny hazakazaka. Misy ny fandraisana anjara amin’izany ka arivo ariary ho an’ ankizy ary roa arivo ny olon-dehibe.

S.A