Betsaka ireo tantsaha no avy dia nanararaotra mba nikarakara ny fambolena raha nisy orana nilatsaka nandrita ny andro maromaro. Misedra olana indray anefa ny any Marovoay, izay sompitry ny vary toy ny any Alaotra fa mihantona indray ny rotsak’orana. Miantso vonjy ny mponina satria ny ketsa efa nafafy noheverina hambolena dia antitra am-pitoerana noho ny tsy fampian’ny rano hanetsana eny an-tanimbary, ny ambioka na ny masomboly teo am-pelantanana voatery hohanina vokatry ny fiakaram-bidin’ny vary tato ho ato. Misendra olana amin’ny fiakaran’ny vidim-bary koa manko na ireo any am-potony aza. Manoloana izany dia mitaraina mafy  ny tantsaha any Marovoay ary miantso fanampiana amin’ny tompon’andraikitra mba hanome ambioka na masomboly hiatrehana ny voly vary amin’ity taona ity.
Tsy ny any Marovoay ihany anefa no velon-taraina fa ny vahoaka Malagasy manerana ny nosy mihitsy. Toy izany ny ao amin’ny Distrikan’Antanambao Manampotsy noho ny fiakaran’ny vidim-bary. Araka ny loharanom-baovao dia vidiana 550 ariary ka hatrany amin’ny 650 ariary ny kapoakan’ny vary gasy arakaraka ny hatsarany. 500 ariary kosa ny kapoakan’ny vary « stock tampon » izay efa misy fofona ary maro ny olona no tsy mahazaka mihinana azy io. Mijaly tanteraka ny vahoaka any an-toerana satria noho ny toetrandro izay tena maina tanteraka dia simba avokoa ny fambolena rehetra indrindra fa ny fambolem-bary ka velon-taraina tanteraka ny mponina.

Tahirisoa