Nanapa-kevitra ny ministeran’ny Fanabeazam-pirenena fa handray an-tanana ireo zaza kamboty miisa 14 miadahy vokatry ny lozam-piarakodia izay nitranga ny 28 janoary lasa teo tany Anjozorobe. Mba ho fanampiana azy ireo dia horaisin’ny Ministeran’ny Fanabeazam-pirenena an-tanana hatramin’ny kilasy famaranana ny fianaran’izy ireo. Nankahery azy ireo ny ministran’ny Fanabeazam-pirenena ny herinandro lasa teo nandritra ny tafatafana nifanaovana.

Raha ny vaovao farany aloha hatreto dia efa nivoaka ny hopitaly Hjra avokoa ireo naratra ka efa miparitaka any amin’ny fianakaviany tsirairay izay monina eto Antananarivo. Roa eo kosa sisa no mbola mijanona manohy ny fitsaboana eny amin’ny hopitaly satria tsy maintsy mbola miandry fandidiana hanohizana ny taolana amin’ny vy. Marihina fa misy amin’ireo ankizy ireo no hany tokana sisa velona fa nindaosin’ny fahafatesana avokoa ny ray aman-dreniny sy ny iraitampo aminy ka dia faly sahirana ihany ireto zaza manoloana ny fanampiana hoentin’ny ministera hoazy ireo. Satria afaka hanohy fianarana na tsy eo intsony aza ireo nianteherana. Saingy malahelo ihany koa naheno ny latsa izay nataon’ny filoham-pirenena azy ireo. Ity farany izay nilaza fa hadisoan’izy ireo no nahatonga ny loza nihatra tamin’izy ireo.  Mety ho marina tokoa nefa mety tsy ho hadisoan’izy ireo ihany koa satria raha ampy ny enti-manana mba nanofa fiara manokana fa tsy nandeha kamio fitaterana omby. Araka ny fitantaran’ny iray tamin’ireo niharamboina moa dia mbola tsy mamo ity mpamily nitondra azy ireo tamin’ny fiaingana tany amin’ny toerana nialan’izy ireo fa rehefa nijanona teo amin’ny ora iray teo ho eo teo amin’ny tanàna iray, noho ny lalana malama dia teo ny mpamily no namely nisotro toaka gasy. Tsy andraikitr’izy ireo mihitsy ny manara-maso ny ataon’ny mpamily mandritra ny ora iray ijanona ka nahitany izay nisotroany toaka tany. Raha ny fantatra ihany koa moa dia efa mihidy eny Antanimora ilay mpamily.

Safidy Andrianina