Omaly no nanatanteraka fiarahabana nahatratra ny taona ireo mpikambana ao amin’ny Fikambanan’ny Betsileo Ampandrana Antananarivo na ny Fi.be.a.a, izay avy any amin’ny distrika Fandriana. Tao amin’ny Epp, Vohibolo no natanterahan’izy ireo izany fotoan-dehibe izany. Araka ny fanazavan’ny filoha dia tsy mitsahatra mitombo ny mpikambana ao aminy. Mahatratra 273 izy ireo ankehitriny ary mavitrika dia mavitrika tokoa amin’ny fanaovana ny adidy. Ny tena tanjona moa dia ny fitsinjovana sy ny fiahiana ireo betsileo avy any amin’ity distrika ity izay mila ravinahitra eto Antananarivo. Ohatra amin’izany, mifamangy rehefa misy marary, miditra hopitaly na ao an-trano mihoatra ny fito andro. Mifanotrona rehefa misy fahoriana ary mifanome tanana amin’ny fikarakarana ny razana. Hamarana ny fankalazana ny faha-30 taona nijoroany ny fikambanana ny 30 mey ho avy izao ary omby miisa 2 no hovonoina hoenti-manamarika izany.

Farah