Efa tsy ao an-tsaina intsony ve ny fanajana lalàna fa dia ny hanohitra hatrany no fantratry ny sasany? Mpitandro filaminana mandamina ny fifamoivoizana teo Analakely manakaiky ny boriboritany voalohany no notoherin’ny vehivavy sy lehilahy nitondra môtô omaly. Tsy nanao aroloha ny iray tamin’izy ireo no antony nanakanan’ny polisy azy. Araka ny fanazavan’ny iray tamin’ireo nanatri-maso ny tranga dia namaly ilay tovovavy fa ao anaty môtô ny casque-ny fa mafana izy dia tsy nanaovany. Nangatahana koa ny taratasy dia namely izy ireo. Rehefa nosakanana izy ireo tsy avy hatrany dia nijanona fa nanohitra ny handeha ihany ka saika naratra tamin’izany ny iray tamin’ireo mpitandro filaminana. Manao ny asany ara-dalàna ireto farany ary tena mitondra ny fanamiana mampiavaka sy ahalalana azy ireo. Nahavariana ihany ny fihetsik’izy ireo satria tsy mamo na marary saina fa dia salama tsara. Tsy nisy akory anefa fanajana fa avy dia namely sy nanohitra fotsiny izao. Nitangorona ny olona ary nandray fepetra avy hatrany moa ireo tompon’andraikitra nitondra ireo tanora nankany amin’ny biraon’ny polisy any Tsaralalàna. Ny lalàna dia napetraka ho an’ny rehetra mba handaminana sy handrindrana ny fiarahamonina. Napetraka ny mpitandro filaminana hanara-maso ny fampiharana izany, indrindra mba hanitsiana ireo mpandika lalàna toa azy roa ireo. Noho izany rehefa tsy te ho voasazy dia mila manaja sy mitandro izay fitsipika ifampifehezana. Fihetsika kely tsy voahevitra fotsiny izao no mahavoasazy.

Tahirisoa