Fito lahy tonga nampihorohoro ny tanàna no nandratra renim-pianakaviana iray tao amin’ny Distrikan’ Andramasina ny Alahady teo. Notifirin’izy ireo teo amin’ny takibany ity ramatoa ity ka naratra mafy ary mbola norobain’ireo olon-dratsy ihany koa ny volany iray tapitrisa ariary.  Araka ny loharanom-baovao dia ity ramatoa ity irery no tao an-trano ankoatran’ny vady aman-janany ka efa tsikaritr’ireo jiolahy izany ka  nohararaotin’izy ireo. Marihina fa efa tsy mitsahatra mahazo vahana ny tsy fandriam-pahalemana ao Andramasina satria nisy fotoana efa tany am-piangonana no niafina ny zaza amam-behivavy, ny lehilahy kosa manao andrimasom-pokonolona. Izay no vokatry ny asan-jiolahy sy ny fampihorohoroana ataon’ny jiolahy. Mitety tanàna ireo olon-dratsy ary dia mampihorohoro tanteraka ny mponina ao an-tanàna. Anisan’ny tratran’izay fandrahonana izay ny tao Ambatofotsy Vatolahy, hany ka raiki-tahotra ny mponina dia mitsoaka mitady toerana hiafenana. Mandry andriran’antsy ny mponina ka manao antso avo amin’ny mpitandro filaminanana.

S.A