Rangahy iray nitondra fiara avy any amin’iny faritra Atsimo iny omaly no niaina  ny tahotra mafy indrindra tamin’ny fiainany. Olona tsy fantatra no nanakan-dalana ary nangataka vola taminy sady nampatahotra azy fa mba hamoahany vola hividianana lasantsy handorana mpangalatra omby araka ny tenin’ireto mpanakan-dalana. “Eo ampanokafana poketra hanome vola izaho no olona be dia be mitangorona ny fiarako mandondona mafy be mihorakoraka io e io e toa izahay ilay nangalatra omby  simba ny fiara. Natahotra be izaho fa soa ihany nisy sasany niteny hoe avelao izy handeha fa izy aza mandray anjara!”, araka ny filazan’ity rangahy tratra ity. Rehefa nandeha alohaloha kely dia olona maro hafa indray no nanao sakan-dalana amin’ny vato fa dia mbola nisy niantra ihany ka nanala ilay sakana. Porofo manamarina tokoa izany fa efa romotra ny vahoaka  ary dia manaonao foana tsy mihevitra intsony ny zavatra ataony. Raha mitohy izao fitsaram-bahoaka izao dia loza ho an’ny firenena mihitsy.

S.A.