Jiolahy iray voalaza fa tompon’ny ketrika tamin’ny fanafihana maromaro, anisan’izany ilay tao Andilamena ny volana desambra lasa teo ity matin’ny zandary ity. Tao Avaratr’Amparafaravola no nisehoan’ny tantara tamin’ny alakamisy lasa teo. Raha ny vaovao voaray dia maro ny fitarainana azon’ny mpitandro filaminana mahakasika fanafihana maro ka tsy maintsy natao ny fikarohana an’io lehilahy io. Tao Amparafaravola noho izany no tra-tehaka izy ary nasaina avy hatrany nanoro ny fanafenany ny omby norobainy sy ireo fitaovana entiny manafika miaraka amin’ireo namany jiolahy. Nandritra ny fisavana natao dia omby 8 ihany no mbola tao am-bala tamin’ireo omby 80 nangalariny. Tamin’ny fotoana nandehanany hanoroana ireo namany anefa dia namoaka ny basiny ity jiolahy ity no sady nandeha nitsoaka. Rehefa nampitandrina elaela ireo zandary ny mba hijanonany dia tsy maintsy nitifitra fa tsy nety nijanona Ranamana. Maty tsy tra-drano rangahy tamin’izany. Mbola mitohy kosa ny fikarohana ireo namany.

Ra Tax.