Misy ny fampitandremana amin’ny hamafin’ny fitsiokan’ny rivotra ho an’ny morontsiraka atsimon’ny Nosy, izay vokatry ny anticyclone izay mahery tokoa. Ao ihany koa ny fampitandremana amin’ny hamafin’ny onjan-dranomasina ho an’ireo faritra ireo ihany, izany hoe any atsimon’ny Nosy, izay vinavinaina ho amin’ny sabotsy 18 febroary  sy ny rahampitso. Ka aoka isika mpampiasa ranomasina mba tsy hiandriaka amin’ireo andro voalaza ireo. Efa tonga amin’ny faritra mena kosa ny any atsimo sy atsimo andrefana raha ny fambara nomen’ny sampan-draharaha mikasika ny toe-trandro. Marihina fa mety hihitatra hatrany Analanjirofo hatramin’ny alahady izany hamafin’ny onjan-dranomasina izany, ka manasa antsika hanaraka hatrany ny vaovao avoakan’ny Météo Madagascar. Mampitandrina mafy ireo mpampiasa ranomasina ny  sampan-draharaha ny fizahana ny mety ho toetry ny andro mba hitandrina tokoa ary tsy hiandriaka mihitsy aza, indrindra fa ny alahady ho an’ny faritra Analanjirofo satria dia mitera-doza ho an’ny rehetra izany.  Hahatratra hatrany amin’ny telo metatra ny haavon’ny onjan-dranomasina vokatry ity rivotra mahery entin’ity andro ratsy ity.

Safidy Andrianina