Anisan’ny asa mampidi-doza ny fangadiana ireny vovo na lava-drano ireny. Ny sabotsy lasa teo dia lehilahy efatra no nidiran-doza tao amin’ny kaominina sy distrikan’i Farafangana, faritra Atsimo Atsinanana. Araka ny vaovoa voaray dia mpanamboatra trano izy ireo ary saika hanamboatra vovo mba hangalana rano ahafahana manatanteraka ny asa. Teo ampangadiana izany anefa izy ireto no niharan-doza. Rehefa tafidina tany ho any amin’ny 50 metatra ambanin’ny tany ry zalahy dia nihotsaka tampoka ny tany ka ny iray tamin’izy efa-dahy no tena tsy avotra intsony raha toa ka nahita hevitra nivoahana ny lavaka ny ambiny. Nikoropaka ny rehetra ary niantso avy hatrany ny mpamonjy voina tao an-toerana. Naharitra ora telo teo ny fikarohana azy. Tsy avotra intsony moa izy ary efa vatana mangatsiaka tsy misy aina intsony no natolotra ny fianakaviany.

 Ra Tax.