Matetika rehefa fampisehoan’ny tarika Olombelo Ricky dia feno hipoka foana ao amin’ity toerana iray fanaovana seho ity. Tsy aiza izany fa ao amin’ny Piment Café eo Behoririka. Tsy mahagaga loatra satria kely loatra ao amin’io toerana io raha mpanakanto efa zatra sehatra goavana toa itony no misafidy hisehatra ao. Nefa raha ny marimarina kokoa dia izay mihitsy ny tanjony satria ny mba hanakaikaizany ny mpankafia azy rehefa mihira izy. Feno hatrany amin’ny varavarana fidirana noho izany ilay fampisehoana tamin’ny zoma lasa teo ary azo lazaina fa nahazo ny anjarany avokoa izay tonga tao, eny na dia misy aza ireo voatery nitsangana satria tsy nisy intsony ny seza. Niarahany sy ny mpankafia azy niredona tao avokoa ireo hira nahafantarana azy izay niarahany tamin-janany lahy teo amin’ny Cajón sy mpitendry gitara beso iray. Nafana ny seho ary nisy mihitsy aza ireo mpijery tsy voatana fa nandihy sy nihira mafy. Avy koa moa ny orana tamin’io fotoana io ka vao mainka naredona ny tao anatin’ilay « lapa kely ».

Ra Tax.