Adalana ve sa misy devoly fa vehivavy iray no milaza fa misy feo miantso foana izy isaky ny alina ary mampirisika azy hanao zavatra hafahafa izany.

Tany Miarinarivo no nitrangan’izany ny alin’ny zoma 26 jona teo. Vehivavy 24 taona, manan-janaka telo no hitrangan’izany isan’andro. Isaky ny matory amin’ny alina dia matetika antsoin’io zavatra tsy fantatra io foana izy mba hivoaka ny trano. Misy fotoana dia tena mivoaka mihitsy izy ary mandeha fa tazan’ny ao an-trano foana ka tsy lasa lavitra fa miverina avy hatrany.

Fa tamin’ity indray mitoraka ity dia nasain’ilay feo hamono tena mihitsy ilay renim-pianakaviana. Araka ny fantatra dia nirahan’ilay feo hafahafa nanatsatoka antsy ny fony izy ka tena notanterahany izany saingy tsy nahafaty azy.  Efa izy nikiakiaka mafy be no nahataitra ny havany. Rehefa nojerena dia tratra teo aminy ilay antsy sady feno rà be ny tratrany. Rehefa nanontaniana an’ity fehitsika nataon’ity ilay vehivavy dia nitantara an’io feo hafahafa tsy hay hoe avy aiza ity niantso azy izay naniraka azy hamono tena.

Laurena Nany