Ny andron’ny zoma teo no nitrangan’izany vono olona miampy fanendahana tany ambanivohitr’i Ampohibe ao anatin’ny distrikan’i Antalaha. Ramatoa iray nandeha irery no nosakanan’ny andian-jiolahy maromaro mitondra zava-maranitra tao amin’io toerana io. Miisa fito izy ireo no nanakana azy ka ny telo nijaridana teo alohany raha nijanona tao aorianany kosa ny efatra ambiny. Nandrahona an’ilay ramatoa avy hatrany izy ireo mba hanome ny firavaka izay teny aminy. Saingy nanda izany ity vehivavy ary mbola nanao vava be an’ireo tsy mataho-tody ka niafara tamin’ny fandratrana azy. Vao tsy nety nifandaharana mantsy ilay ramatoa dia novelesin’izy ireo hazo be. Tsy vitan’izay ihany koa fa mbola norasarasain’ireo jiolahy tamin’ny antsy ihany koa ny tarehiny. Lasa tamin’izany ny vola sy volamena teny aminy. Olona sendra nandalo no nahita an’ilay ramatoa naratra mafy ka nitondra azy avy hatrany teny amin’ny toeram-pitsaboana ao an-tampon-tananan’i Antalaha. Tsy misy ahiana ny ain’ilay ramatoa araka ny filazan’ny mpitsabo nandray an-tanàna azy.