Tahaka ny fety rehetra dia betsaka ireo niharan’ny loza nandritra ny fankalazana ny fetim-pirenena iny. Tany Mahajanga izao dia olona miisa valo no voatery naiditra hopitaly noho ny fahavoazana be loatra nahazo azy ireo. Araka ny tatitra nataon’ny hopitaly Androva dia maro ireo naratra mafy  vokatry ny ady sy ny fahamamoana be loatra. Fa amin’ny  ankapobeny dia ny lozam-pifamoivoizana no tena nanjaka tany an-toerana. Ny tsy fanajana ny hafainganam-pandeha no tena niteraka ny loza araka ny fantatra. Ireo mpamily kodiarana roa no voakasika amin’izany. Mahatratra dimy ireo niharan’izany, soa ihany fa tsy nisy namoy ny ainy fa naratra mafy fotsiny. Nisy tamin’ireo izay tapaka tongotra mihitsy noho ny dona mafy nahazo azy ireo. Tsy maintsy notazonina eny amin’ny hopitaly ireto olona ireto mba hanarahana akaiky ny fivoaran’ny toe-pahasalamany.

Laurena Nany