Ny alatsinainy 29 jona no nisehoan’izany tao amin’ny fokontany Androva Avaratra ao Ambatodrazaka, tamin’ny 12 ora atoandro, teo akaikin’ny CAPJ.

Nivoaka tao amin’ny CAPJ mihitsy ity kamiao ity no nifandona tamin’ilay taksi-môtô izay tsy nahatana hisatra. Nifatratra tany amin’ny kodiarana aorian’ilay fiara vaventy ilay mpamily taksi-môtô ary tafatsofoka tany ambany fiara ilay môtô raha toa ka nipitika lavitra kosa ilay ankizy nentiny.

Voa mafy ilay mpamily ary nentina haingana teny amin’ny tobim-pahasalamana. Tsy misy ahiana kosa ny ainy araka ny mpitsabo nandray an-tanana azy.

Mateti-pitranga ny lozam-pifamoivoizana ao an-tampon-tananan’i Ambatondrazaka ary ny tsy fitandremana no tena mahatonga izany. Eo ihany ny fidiran’ireo mpivarotra ao amin’ny tsenan’Ambatondrazaka eny afovoan-dalana ka manelingelina ny fifamezivezen’ireo fiara sy môtô any an-toerana. Efa nisy ihany ny fanamafisana nataon’ireo mpitandro filaminana amin’ny fitandroana ny fifamoivoizana fa mbola betsaka no tsy mitandrina araka ny nambaran’ny loharanom-baovao.