Nandeha be ny resaka fa efa nametra-pialana tamin’ny faramparan’ny herinandro lasa teo ny mpikambana miisa 9 ao amin’ny filan-kevim-pitantanan’ny Air Madagascar, ka anisan’izany i Henry Rabary Njaka. Toa nanamafy io resaka niely io ny fanambaran’ny filoha Rajaonarimampianina mikasika ny mety ho fanovana ireo mpikambana ao amin’ity filan-kevi-pitantanana ity. Tsy mbola nisy filazana ofisialy aloha mikasika izany rehetra izany fa voalaza fa notazomina ho tsiambaratelo ary mbola tsy nanamafy ny mampitombina io ihany koa i Henry Rabary Njaka omaly. Voalazan’ny loharanom-baovao anefa fa miandry ny fanendrena ireo mpikambana vaovao ny fanambarana ofisialy ity fametraham-pialan’ny filohan’ny filankevim-pitantanana ity. Raha tena voamarina izany dia voavaly amin’ny ampahany ny fitakian’ny mpiasan’ny Air Madagascar ary miroso tsikelikely amin’ny fikaroham-bahaolana ny raharaha. Tsikelikely satria marobe ireo olona eo anivon’ny fitondram-panjakana no tokony hametra-pialana.

Radom