Miparitaka ny zava-mahadomelina amin’izao. Mirongatra ny asa ratsy. Raim-pianakaviana iray 30 taona, manan-janaka efatra, monina ao Marofify izay mpivarotra rongony ikoizana ao Toliara no voasambotry ny polisy tao Sanfily niaraka tamin’ny rongony 20 kilao natao tao anaty valizy, ny alin’ny asabotsy teo, tamin’ny 8 ora. Raha ny fanazavana azo dia vao avy novidiny iray hetsy ariary ireto rongony tratra ireto ary saika amidiny roa hetsy ariary tamin’io andro io ihany.

Naverin’ny fitsarana !

Teo am-pandehanana  « cyclo-pousse » ity lehilahy mpibizina jamala malaza efa narahi-maso hatry ny ela ity no nahamahina ny mpitandro filaminana manao fisafoana amin’ny alina ny fihetsiny. Nosavaina ny entany ka sarona ireto zava-mahadomelina. Raha ny nambaran’ity lehilahy voasambotra rehefa nofotorana dia efa roa taona no nanaovany ny asa fivarotana sy fanaparitahana rongony. Afak’omaly ny tenany no natolotra ny fitsarana, saingy naverin’ireto farany any amin’ny mpitandro filaminana indray. Gaga amin’izao fihetsiky ny ao amin’ny fitsarana izao ny tompon’andraikitry ny polisy ao Toliara. Tsy ampy indray angaha ny vesatra iampangana ? Ao raha !

Eric Toliara