Miparitaka ny fitaovam-piadiana amin’izao ka mampirongatra ny asa ratsy etsy sy eroa ary mandry andrin’antsy ny vahoaka. Voasambotry ny polisy afak’omaly hariva tamin’ny enina ora, rehefa nokarohina iray volana mahery ny lehilahy iray 38 taona, manan-janaka efatra izay mpanamboatra sy mpivarotra basy mahery vaika vita tanana, monina ao Andamasinina Toliara. Raha ny fanazavana azo dia tafaporitsaka tamin’ny fotoana nisamborana azy ny tolakandron’ny 28 mey ity mpibizina basy ity, raha voasambotra tamin’io andro io ny vadiny izay efa any am-ponja amin’izao fotoana izao.

Basy roa efa vita sarona

Tsiahivina fa taorian’ny fanomezam-baovao mari-pototra avy tamina olon-tsotra tsara sitrapo dia nosavain’ny mpitandro filaminana sy ny avy ao amin’ny fitsarana Toliara notarihan’ny lehiben’ny fampanoavana ny tranony. Basy roa efa vita no sarona niampy vodi-basy sy « canon » maromaro ary taratasy ara-panjakana efa vita fitomboka sy sonia. Basy P.A telo tratra teo am-panamboarana. Harifomba ny fitaovana ary ao anaty lakavy ambanin’ny trano fonenany ihany izay toerana mangina no hanamboarana ireo basy. Matihanina tanteraka e !

Eric Toliara