Noraisim-potsiny i Telolahy Eugène antsoina ihany koa hoe Lahimy niaraka tamin’ireo namany telo rehefa tazan’ny olona tsara sitra-po nividy entana sy teo am-panisana vola be avy nangalariny tao Andovoranto Brickaville.

Ireto farany izay tompon’antoka tamin’ny fanafihana tranombarotra tao amin’ny toerana voalaza etsy ambony ny alin’ny 26 mey hifoha 27 mey lasa teo. Iray volana taorian’ny fitarainana nataon’ny lasibatra dia nisy nahatsikaritra ity jiolahy sy ramatoa vadiny nandritra ny fividianana entana maro be toy ny zava-maneno, fahitalavitra, vary amin’ny kitapo.

Nampandrosoan’izy mivady tao an-trano ity olona ity fa hoe hitokana ireo entana vaovao. Mody nanao mamo alohan’ny tompon-trano ilay ranamana ka nangataka fandriana hatoriana. Nandritra izay anefa dia nanisa ireo vola halatra izy mivady. Tsy nampoizin’ireo fa nifoha tampoka ity vahiny sady nilaza hoe « Manambola ianareo zany an! » Izy mivady kosa tsy rototra namaly hoe « Manaova lehilahy tahaka anay dia mahita vola be ary aza be resaka fa omenay anjara vola ianao. »

Nampilaza ny mpitandro filaminana avy hatrany ilay vahiny ka nosamborina i Lahimy sy Fara vadiny ary i Leso izay mpiray tsikombakomba tamin’izy mivady. Tamin’ny fisamborana dia nahatratrarana lelavola 23 000 ariary tany amin’izy ireo. Taorian’ny famotorana azy telo dia nampidirina am-ponja vonjimaika ao amin’ny fonjan’ Ambalatavoahangy izy ireo.

Laurena Nany