Ny voalohan’ny herinandro teo no nisehoan’izany tao Manakambola, kaominina Ambatondrazaka. Zazalahy 10 taona maty tsy tra-drano ary lehilahy iray kosa naratra mafy rehefa notrongisin’ny fiara vaventy avy ao aoriana ny môtô nanao taingin-telo nisy azy. Nampidirina hopitaly avy hatrany ilay naratra, ity farany izay fantatra fa namily ilay kodiaran-droa.

Nandositra avy hatrany kosa ilay kamiao nahavanon-doza. Nifanenjahana ilay saofera fa tsy tratra mihitsy.  Taorian’ny fizahana nataon’ny mpitandro filaminana dia nisy ny fanapaha-kevitra noraisina mba hanamafisana ny fitandroana ny fifamoivizana any an-toerana.

Araka izany dia hisy fanaraha-maso ny fifamoivoizana mba hisorohana ny loza mateti-piseho izay ateraky ny kodiaran-droa. Hisy ny toromarika omena azy ireo ary tsy handefitra amin’izay mandika lalàna ny mpitandro filaminana.

Raha tsiahivina, ny herinandro lasa tao Avaradrova dia nisy môtô hafa nanao taingin-droa no nifatratra tamin’ny fiara vaventy noho ny tsy fitandreman’ny mpamily izany môtô izany. Torana tsy nahatsiaro tena ity farany tamin’io lozam-pifamoivoizana io raha toa ka nipitika kosa ilay zaza nentiny.

Laurena Nany